للكبار فقط

:: للكبــــــــــــــــــــــــــــار فقط ::

عارفين إيه يا شباب اللي للكبار فقط ؟
لا لا لا مش اللي ف بالكم خالص :)

اللي ( للكبار فقط ) دي حاجة كلنا بندّعي إن احنا بنجري وراها ،
وكلنا بنقول إنها هدفنا الأول والأخير في الحياة ،
وكلنا بنعشم نفسنا فيها !!

بس للأسف ( ليس بأمانيكم )

للكبار فقط ، للي فعلا صدق مع نفسه وعرف يربيها صح ،
للكبار فقط ، للي فعلا تفكيره وهمته همة الأكابر !!
للكبار فقط ..

هو إيه اللي للكبار فقط ؟

الجنة يا شباب !! أيوه الجنة اللي كلنا بنقول إن احنا نفسنا ندخلها ؛؛
بس للأسف كتير منا كلمنجي .. فنجري بؤ .. مش بياخد من نفسه غير الكلام !! إلا من رحم الله
فاكر أول يوم في التزامك ؟ فاكر الحماسة اللي كانت عندك ؟
فاكر قيامك لليل بالساعة والساعتين ؟ فاكر صيام الاتنين والخميس ؟
فاكر اجتهادك في طلب العلم ؟ وحرصك على الصف الأول ؟
فاكر وفاكر وفاكر .... ؟

يااااااااااااااااااااااااه !! كانت أيام !!
ليت الشباب يعود يومًا :)

طيب ، انتا ليه كنت كده في بداية الالتزام ودلوقت نخّيت خالص ؟
إيه السبب ؟ اقف مع نفسك وقفة !! حاسبها !!
هو أنا ليه كنت في بداية الالتزام شعلة نشاط ؟ ودلوقت ... !!!!!!
إيه السبب اللي كان بيدفعني للتفاني في خدمة ديني والدعوة ؟ ودلوقت ... !!!!
فكر انتا ليه بقيت كسولي أوي كده في طاعة ربنا ،
فكر انتا ليه الأول كنت مع الإخوة زي النسمة ودلوقت بتعامل كتير منهم وحش ..

هو مش انتا بتقول نفسي أدخل الجنة !!!
سبحان الله !! لما الزيت والسكر غلو لقينا اللي بقى يشتغل شغلتين واللي بيطبق في الشغل واللي بيفكر في مشروع ..
ولما رسول الله قال : ( ألا إن سلعة الله غالية ، ألا إن سلعة الله الجنة )
محدش فينا حاول يدبر سعر السلعة دي بالطاعات وفعل الخيرات !!
يعني محدش حاول يجتهد عشان يشتري السلعة دي ،
مع إن انتا لو فكرت في سعرها هتلاقيه حاجات بسيطة جدًا ،
يعني مثلا ( من قال سبحان الله وبحمده غرست له نخلة في الجنة )
اشتريت نخلة في الجنة جزعها من الدهب بكلمتين تلاته !! تخيل !!!!!!!

بس سدأني ، مش هيواظب على الكلميتن دول غير ( الكبــــــــار فقط )

مش هيعرف يشتري الجنة غير واحد كبير عند ربنا بطاعته وتقواه ،،
فيا ترى مين فينا الكبير ؟؟؟؟
مين نفسه يدخل الجنة ؟؟؟؟؟

خلاص يا شباب إيه رأيكم نتفق على حبة حاجات نعملهم ونبدأ بداية جديدة ،،
آآآآه فيها إيه لو جددنا التزامنا النهارده ؟
بص يا سيدي أنا مرة سألت دكتور أحمد فريد - الله يحفظه وبيارك في عمره -
يا شيخنا ممكن حضرتك تقوللي على حاجات أعملها عشان أرتقي إيمانيًا وعلميًا ؟؟

فرد عليا الشيخ بالآتي :

بص !! عشان ترتقي إيمانيًا لازم تعمل حاجات لمدة 6 شهور وبعد كده أحددلك حاجات تانية ..
1 - قراءة 3 أجزاء يوميًا
2 - صيام الاتنين والخميس
3 - المواظبة على الاذكار
4 - غض البــصـــــــــــــــر
5 - كتر من الاستغفــــــــار
6 - محاسبة النفس أول بأول
7 - تكـــبيرة الإحـــــــــــــــرام
8 - المواظبة على السنن الرواتب

وعشان ترتقي علميًا أنصحك الأول بقراية كتابين واحد في الفقه وهو فقه السنة والتاني في العقيدة
وهو كتاب الشيخ ( عقيدة أهل السنة والجماعة ) أو ( الثمرات الزكية في العقائد السلفية )
وكمان المواظبة على درس ولا درسين في الأسبوع ..
لو واظبت على الحاجات دي لمدة 6 شهور هتلاحظ فرق كبير جدًا في إيمانياتك ..

_

يلا نبدأ سوا عشان نكون كبــــــــــــــــــار ..
عشان الجنة ،،

:: للكــــــــــــــــــــــــــــــــبار فقط ::



.

.

.

والله يا شباب أنا مكتبتش الكلام ده غير لما حسيت بفتور سيطر عليا ،
وزي ما قولتلكم قبل كده .. ديمن لما انتا بتنصح إخوانك وتدعو لله إيمانياتك بتعلى خالص ،،

.

.

سبحانك اللهم ربنا وبحمدك ، أشهد ألا إله إلا أنت
أستغفرك وأتوب إليك



منقووووووووووووووووول للامانه

جزاك الله خيرا و بارك في عمرك
و متعك بالصحة و العافيه

وفقكم الله فيما فيه خير لكم